Gurekin urtebete baino gutxiago badaramazu, lehenik eta behin, ongi etorri eta pozten nau zure Gabonetako saskia bezala agurtzeak 😉. Zuretzako dena berria izango da, eta ez duzu jakingo gure lagun, senide eta ezagunek gugandik hurbil ekoizten dituzten produktuez osatuta nagoela. Batzuk klasikoak dira, eta denborarekin ezagutuko (eta itxarongo) dituzu, besteak datozen eta doazen berritasunak dira. Dagoeneko bulegoetako obra gehiago bizi izan badituzu etxean izan dituzunak baino, ingurumariak alde batera utzita, goazen interesatzen zaigunera.

ZERRENDA

Turroia bezala bueltan dira Iñaki Díazen aitaren eztia Antoñanatik, Lapuebla de Labarcako ardo ondua Iraitzek proposaturikoa eta Deliak Kanpezutik ekartzen digun odolkia. Gainera, Maitek Gernikatik ekartzen dituen Oribaltzak errepikatzen ditugu (aurkikuntza handia…), eta Nafarroatik datozen produktuen zerrenda luzea: Liher eta Raquelek Altsasutik txistorra eta patea dakarkigute, Lodosako piperrak Amaiaren eskutik, eta dagoeneko klasikoak diren Oibarreko pastak, María Garderi esker gozatuko ditugunak.

Danbor-arradak aurtengo nobedadeentzat. Egiozue lekua Jon Irabienek dakarren Zallako txakolinari, Otxandioko Idiazabal gaztari Gaizka Mirandaren eskutik, Peraltako zainzuriei Alex Torreguitartek ekartzen dituenak, Roberto Murgaren Castejoneko ardo gorrixkari, Iscareko pinazi iberikoari June Antónen eskutik, eta Arkaitz Duroren ahuakatezko olioaren itzulerari, duela pare bat urte ahosabaia ireki eta arrakasta izan ondoren, noiz itzuliko ote zen galdezka gintuena!

Behin husten nauzula, gogoratu ezazu kartoizkoa naizela, %100 berrerabilgarria eta birziklagarria. Jasoko duzun lagun ikusezinaren oparia ganbarara igotzeko baliagarria naiz (zu eta biok badakigulako hor bukatuko duela, gogoratu abisatu zintudala) edo beste urte batez bulegora Gabon gauean ekartzen ditugun gabonetako jertseak gordetzeko (lehiakortasuna gogorra eta maila altua dira, baina parte hartzera gonbidatzen zaitut). Ni berrerabiltzea ez baduzu aukeratzat hartzen, edukiontzi urdinean utzi nazazu eta ordutik aurrera ni neu kudeatuko naiz.

Portzierto, tonbolako erreferentzia ez baduzu hartu, Gasteiz, Bilbo, Donostia edo Iruñeatik pasatzen diren azoka ibiltariren batera joatera animatzen zaitut, non, ia azoka huek bezain ospetsuak garen gure irekierei esker… eta etorriko direnak. Stay tuned eta hurrengo urtera arte!